Ny fandehanana tongotra lavitr'ezaka
(anaty valan-javaboharim-pirenena na manodidina ny saikanosy)

Inona no mety ho hita any?
Mamakivaky ny atin'ny ala mando lava voasokajy ho iva sy antonony ianao. Mandritry ny fandehanana an-tongotra dia mety ho avy ny orana (izay no maha ala manoran-dava azy), hitsàka renirano eo amin'ny roapolo eo ianao izay mety ho be na kely velarana, tapatapahin'ny fiakarana somary henjana. Io no fotoana ahafahanao mahita tsara ny hakanton'ny biby sy ireo zava-maniry ao Masoala. Anisan'ny lalana iray ahafahanao mitsidika ireo tanàna kely Betsimisaraka koa izany. Ireo tanimbary dia manamorona ireo tanàna ireo, fa eo koa ny fambolena lavanila, kafe ary akondro.

Inona ireo fitaovana tokony ho entina?
Raha atombokao ao Maroantsetra ny fandehanana an-tongotra, dia manofà lakana mandeha maotera hahatongavana any Navàna, afaka andehanana tongotra koa na an-dakana tsotra ny 20 km mampiseraka ireo toerana roa ireo. Ao Navàna no manomboka ny fandehanana tongotra, mandalo an'i Mahalevona, Ambatoledama, ary Ampokafo. Ao Ampokafo ianao no misafidy na andeha any amin'ny Cap Est na ho any Antalaha.

Raha avy any Antalaha kosa indray no miainga, dia afaka mandeha taxi-brousse ianao mandra-pahatonga ao Marofinaritra ary mandeha an-tongotra hatrany Maroantsetra rehefa avy nandalo an'Ampokafo, Mahalevona ary Navàna.

Farafaharatsiny ekeo ny 4 andro hamakivakiana izay lalana izay raha maika ianao. Ny ankamaroan'ireo mpizahantany dia misafidy 5 na 7 andro eo hanaovana izany.