Eo anelanelan'ny faritanin'i Toamasina, Antsiranana, ary Mahajanga no ahitana ny faritra voaaron'i Makira. Manana fivelarana eo amin'ny 385 000 ha eo ho eo sy 850 km mamehy azy, Makira dia mitoetra amin'ny faritra avaratr'i Mananara avaratra hatrany Andapa, Maroantsetra ary Antsakabary, izay mbola eo ambany fileovan'i Befandriana avaratra. 150 000 eo ho eo no isan'ireo mponina mipetraka manodidina ireo vaingana ala hanjakan'ireo karazam-biby toy ny gidro, biby mandady, sahona, vorona, ireo biby mampinono ary ireo karazana zava-maniry maro. Ny ampahany lehibe amin'i Makira dia tafiditra ao anatin'i Maroantsetra, faritanin'i Toamasina.
Noho io toerana misy azy ara-jeôgrafika io, ny faritra voaaron'i Makira dia mety hanana, azy manokana, toerana idealy ho an'ireo karazam-biby tsy dia fahita firy, kanefa mety ho hita any amin'ireo ala mando lava sy manamorona ny ranomasina eto Madagasikara.
Ny fidirana ao amin'io toerana io dia mora kokoa raha avy ao Maroantsetra. Ny fandehanana an-tongotra ihany no ahafahana mitsofoka anatin'ny ala mikitroka satria mbola tsy misy ny lalana mazava fandehanana dia an-tongotra lavitra mankany. Raha tianao anefa ny mizaha sy mitady zava-baovao dia ny tsara indrindra manontany ireo mpanoro lalana ao Maroantsetra.